ដំណើរទស្សនកិច្ច និងពិភាក្សាការងារ ដើម្បីស្វែងរកឱកាសការងារ ជូននិស្សិតបញ្ចប់ការសិក្សាពីប្រទេសចិន================​នារសៀលថ្ងៃទី២៩ ខែឧសភា ឆ្នាំ២០២៦ ឯកឧត្តម អ៊ុ វុទ្ធទី ប្រធានក្រុមប្រឹក្សាភិបាលសមាគមនិស្សិតកម្ពុជាប្រចាំសាធារណរដ្ឋប្រជាមានិតចិន និងជាប្រធានសមាគមទំនាក់ទំនងយុវជនកម្ពុជា-ចិន ព្រមទាំងជាជំនួយការសម្តេចតេជោ បានដឹកនាំគណៈប្រតិភូសមាគម អញ្ជើញទៅទស្សនកិច្ច និងពិភាក្សាការងារ នៅក្រុមហ៊ុន រោងចក្រ UP Aluminum (顶峰铝业制造（柬埔寨）有限公司) ដែលមានទីតាំងស្ថិតនៅក្នុងតំបន់សេដ្ឋកិច្ចពិសេសខេត្តកំពង់ចាម។​ជំនួបពិភាក្សាការងារនេះ ធ្វើឡើងក្នុងគោលបំណងយ៉ាងសំខាន់ក្នុងការស្វែងយល់ពីសង្វាក់ផលិតកម្ម ក៏ដូចជាផ្សព្វផ្សាយ និងបង្កើតឱកាសការងារល្អៗ ជូនដល់ប្អូនៗនិស្សិតកម្ពុជាដែលបានបញ្ចប់ការសិក្សាពីសាធារណរដ្ឋប្រជាមានិតចិន ឱ្យស្របទៅនឹងជំនាញ និងសក្តានុពលរបស់ពួកគេ ដើម្បីចូលរួមចំណែកអភិវឌ្ឍន៍សេដ្ឋកិច្ចជាតិ។​ជាលទ្ធផលគួរឱ្យត្រេកអរ ក្រុមហ៊ុនបានបង្ហាញពីតម្រូវការកម្លាំងពលកម្មជំនាញ និងផ្តល់ជូននូវកម្រិតប្រាក់បៀវត្សរ៍យ៉ាងខ្ពស់ ទៅតាមប្រភេទមុខតំណែងដូចខាងក្រោម៖​🎯 ១. ប្រភេទមុខតំណែងអាជីវកម្មស្នូល (Core Business Positions)៖​គ្របដណ្តប់លើវិស័យស្នូលចំនួនបួន៖ ពាណិជ្ជកម្មអន្តរជាតិ ការស្រាវជ្រាវ និងអភិវឌ្ឍន៍ (R&D) ខ្សែសង្វាក់ផ្គត់ផ្គង់ និងប្រតិបត្តិការផលិតកម្ម (រួមទាំងមុខតំណែងរងដូចជា ការលក់ និងវិស្វកម្មដំណើរការ)។​🎯 ២. មុខតំណែងមុខងារទូលំទូលាយ (Comprehensive Functional Positions)៖​រួមបញ្ចូលទាំងផ្នែកមុខងារសំខាន់ៗចំនួនបី៖ ការគ្រប់គ្រងទូលំទូលាយ ហិរញ្ញវត្ថុ និងបច្ចេកវិទ្យាព័ត៌មាន (IT) (រួមទាំងមុខតំណែងរងដូចជា ធនធានមនុស្ស រដ្ឋបាល និងទំនាក់ទំនងរដ្ឋាភិបាល)។​💰 កម្រិតប្រាក់បៀវត្សរ៍ដែលផ្តល់ជូន៖​🎓 ថ្នាក់បរិញ្ញាបត្រ៖ 800$ - 1,200$​🎓 ថ្នាក់បរិញ្ញាបត្រជាន់ខ្ពស់៖ 1,000$ - 1,500$​🎓 ថ្នាក់បណ្ឌិត៖ 1,500$ - 2,000$✍️ក្រុមហ៊ុន ក៏មានផ្តល់ការស្នាក់នៅ និងអាហារ ព្រមទាំងការបណ្តុះបណ្តាលបន្ថែមជូនបុគ្គលិកផងដែរ។

នៅរសៀលថ្ងៃទី១៥ ខែឧសភា ឆ្នាំ២០២៦ ឯកឧត្តម អ៊ុំ វុទ្ធទី ស្ថាបនិក និងជាប្រធានក្រុមប្រឹក្សាភិបាលសមាគមនិស្សិត បានទទួលជួបពិភាក្សាការងារជាមួយលោក Zhou Rui អគ្គនាយករង Dihang Group ទទួលបានបន្ទុកធនធានមនុស្សរបស់ក្រុមហ៊ុន ដែលត្រូវការបុគ្គលិកជំនាញ២០០នាក់ ក្នុងរយៈពេល៣ឆ្នាំខាងមុខ។ ក្រុមហ៊ុន ស្នើសុំសហការជាមួយសមាគមនិស្សិត ដើម្បីណែនាំនិស្សិតកម្ពុជាដែលបញ្ចប់ការសិក្សាពីប្រទេសចិន។ **ចាប់ថ្នាក់បរិញ្ញាបត្រ ដល់ថ្នាក់បណ្ឌិត ប្រាក់ខែចាប់ផ្តើម 800$-2000$ ។

នាថ្ងៃទី៤ និងទី៥  ខែឧសភា ឆ្នាំ២០២៦ ឯកឧត្តម អ៊ុំ វុទ្ធទី ប្រធានក្រុមប្រឹក្សាភិបាលសមាគម និងជាជំនួយការសម្តេចតេជោ បានអមដំណើរ ឯកឧត្តម អ៊ុច បូររិទ្ធ ប្រធានស្តីទីព្រឹទ្ធសភា បាននាំយកអំណោយដ៏ថ្លៃថ្លារបស់ សម្តេចតេជោ ប្រមុខរដ្ឋស្តីទី និងជាប្រធានព្រឹទ្ធសភា ជាសម្ភារៈប្រើប្រាស់ និងថ្នាំពេទ្យជូនដល់វីរកងទ័ពជួរមុខនៅបញ្ជាការដ្ឋានយោធភូមិភាគទី៤ ខេត្តសៀមរាប និងជូនដល់វីរកងទ័ពជួរមុខ នៅកងពលអន្តរាគមន៍ធំលេខ៣ និងកងពលអន្តរាគមន៍តូចលេខ៩ ខេត្តព្រះវិហារ។

នៅល្ងាចថ្ងៃទី១២ ខែមេសា ឆ្នាំ២០២៦ ក្រុមការងារសមាគមនិស្សិតកម្ពុជាប្រចាំសាធារណរដ្ឋប្រជាមានិតចិន និងសមាគមទំនាក់ទំនងយុវជនកម្ពុជាចិន ដឹកនាំដោយ ឯកឧត្តម អ៊ុំ វុទ្ធទី ប្រធានក្រុមប្រឹក្សាភិបាល លោកជំទាវ LI XUELIN ទីប្រឹក្សាជាន់ខ្ពស់សមាគម និង កញ្ញា ហោ រស្មី អនុប្រធានក្រុមប្រឹក្សាភិបាល និងជាអតីតប្រធានសមាគមនិស្សិតអាណត្តិទី៥ និងទី៦ ព្រមទាំងក្រុមជំនួយការឯកឧត្តម អ៊ុំ វុទ្ធទី បានចែកស្បៀងជូនប្រជាពលរដ្ឋក្រីក្រ ១០០គ្រួសារ តាមរយៈការសម្របសម្រួលពីមេភូមិព្រែកលៀប សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ ក្នុងឱកាសចូលឆ្នាំថ្មី ប្រពៃណីជាតិខ្មែរ ខាងមុននេះ។

ក្នុងអំឡុងវិស្សមកាលរដូវរងានេះ ថ្នាក់ដឹកនាំ និងក្រុមការងារសមាគមនិស្សិតកម្ពុជាប្រចាំសាធារណរដ្ឋប្រជាមានិតចិន បានស្ម័គ្រចិត្តនាំយកសម្ភារសិល្បៈ ជាបន្តបន្ទាប់ទៅតាមបណ្តាខេត្ត-ក្រុងនានានៃប្រទេសចិន។ សម្ភារទាំងនេះ គឺជាមធ្យោបាយដ៏សំខាន់សម្រាប់និស្សិតកម្ពុជា ក្នុងការប្រើប្រាស់ដើម្បីផ្សព្វផ្សាយវប្បធម៌ អរិយធម៌ខ្មែរ និងទាក់ទាញភ្ញៀវទេសចរណ៍ ឱ្យមកកម្សាន្តនៅប្រទេសកម្ពុជា។សូមបញ្ជាក់ផងដែរថា សម្ភារសិល្បៈទាំងអស់នេះ គឺជាអំណោយដ៏ថ្លៃថ្លារបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុន​ ម៉ាណែត តាមរយៈសមាគមនិស្សិតកម្ពុជាប្រចាំសាធារណរដ្ឋប្រជាមានិតចិន។

នៅព្រឹកថ្ងៃសៅរ៍ ទី២៨ ខែកុម្ភៈ ឆ្នាំ២០២៦ នេះ ឯកឧត្ដម អ៊ុំ វុទ្ធទី ស្ថាបនិក និងជាប្រធានក្រុមប្រឹក្សាភិបាលសមាគមនិស្សិតកម្ពុជាប្រចាំសាធារណរដ្ឋប្រជាមានិតចិន (ACSC) និងជាជំនួយការសម្ដេចតេជោប្រធានព្រឹទ្ធសភា បានអញ្ជើញជាវាគ្មិនកិត្តិយសក្នុង «កិច្ចប្រជុំតម្រង់ទិស និងផ្សព្វផ្សាយអាហារូបករណ៍ទៅបន្តការសិក្សានៅប្រទេសចិន» ដែលមានការចូលរួមពីសិស្ស-និស្សិតប្រមាណ ៣០ នាក់។ក្នុងឱកាសនោះ ឯកឧត្ដម អ៊ុំ វុទ្ធទី បានចែករំលែកនូវបទពិសោធន៍ និងព័ត៌មានលម្អិតជុំវិញឱកាសសិក្សានៅក្នុងប្រទេសចិន ព្រមទាំងលើកយកចំណុចសំខាន់ៗយកមកបង្ហាញដូចជា៖​​-វិធីសាស្ត្រក្នុងការដាក់ពាក្យស្នើសុំអាហារូបករណ៍ឱ្យមានប្រសិទ្ធភាព និងការត្រៀមលក្ខណៈសម្បត្តិផ្នែកភាសា និងចំណេះដឹងទូទៅ-ការផ្សព្វផ្សាយអំពីប្រភេទអាហារូបករណ៍ផ្សេងៗ ទាំងអាហារូបករណ៍រដ្ឋាភិបាលចិន អាហារូបករណ៍ថ្នាក់ខេត្ត និងអាហារូបករណ៍តាមបណ្តាសាកលវិទ្យាល័យល្បីៗ។ឯកឧត្ដមបានសង្កត់ធ្ងន់ថា ការទៅបន្តការសិក្សានៅក្រៅប្រទេស មិនត្រឹមតែជាការក្រេបជញ្ជក់យកចំណេះដឹងក្នុងថ្នាក់រៀនប៉ុណ្ណោះទេ ប៉ុន្តែគឺជាការបើកចក្ខុវិស័យឱ្យកាន់តែទូលំទូលាយ ដើម្បីត្រឡប់មកវិញក្នុងនាមជាធនធានមនុស្សដ៏សំខាន់ ក្នុងការចូលរួមអភិវឌ្ឍន៍មាតុភូមិកម្ពុជាឱ្យកាន់តែរីកចម្រើន ស្របតាមគោលនយោបាយរបស់រាជរដ្ឋាភិបាល។កិច្ចប្រជុំបានបញ្ចប់ទៅក្រោមបរិយាកាសស្និទ្ធស្នាល ដោយនិស្សិតដែលបានចូលរួមបានលើកឡើងនូវសំណួរជាច្រើន និងទទួលបានការបកស្រាយយ៉ាងក្បោះក្បាយពីសំណាក់ឯកឧត្ដមប្រធាន ដែលជាការផ្តល់នូវកម្លាំងចិត្ត និងក្តីសង្ឃឹមយ៉ាងធំធេងសម្រាប់អនាគតសិក្សារបស់ពួកគេ៕

នាព្រឹកថ្ងៃទី២៧ ខែមករា ឆ្នាំ២០២៦ ឯកឧត្តម អ៊ុំ វុទ្ធទី ស្ថាបនិក និងជាប្រធានក្រុមប្រឹក្សាភិបាលសមាគមនិស្សិត បានទទួលស្វាគមន៍និងពិភាក្សាការងារជាមួយគណៈប្រតិភូធនាគារចិន (សាខាភ្នំពេញ) ដឹកនាំលោក YEUNG KIM MAN អនុប្រធានធនាគារចិនសាខាភ្នំពេញ។ ភាគីទាំងពីរ បានព្រមព្រៀងក្នុងកិច្ចសហការការងារមួយចំនួន ដោយបានចុះហត្ថលេខាលើអនុស្សរណៈយោគយល់គ្នា រវាងសមាគមនិស្សិត និងធនាគារចិន។

មាតុភូមិកំពុងជួបការលំបាក បងប្អូននិស្សិតខ្មែរដែលសិក្សានៅប្រទេសចិន ក៏នៅមិនស្រណុកក្នុងខ្លួន ពិបាកចិត្ត ដោយសារតែឈ្លានពានរបស់ចោរសៀម ម្តងហើយម្តងទៀត។ នាពេលនេះ វីរៈកងទ័ពជួរមុខយើង កំពុងប្រគៀកស្មាប្រយុទ្ធការពារទឹកដីដូនតាខ្មែរយើង រីឯប្រជាពលរដ្ឋជាជនភៀសសឹក កំពុងស្វែងរកកន្លែងសុខសុវត្ថិភាព ដែលកំពុងជួបប្រទះបញ្ហាជីវភាពរស់នៅ។ ដើម្បីរួមចំណែកក្នុងទុក្ខលំបាក និងបន្តបង្ហាញទឹកចិត្តស្នេហាជាតិ ដើម្បីរួមចំណែកជួយដល់យុទ្ធជនរីវៈកងទ័ព និងប្រជាពលរដ្ឋសូតត្រង់កំពុងរងគ្រោះនៅតាមបណ្តាព្រំដែនកម្ពុជា-ថៃ សមាគមនិស្សិតកម្ពុជាប្រចាំសាធារណរដ្ឋប្រជាមានិតចិន (ACSC) ជាថ្មីម្តងទៀត សូមអំពាវនាវដល់បងប្អូននិស្សិតខ្មែរគ្រប់រូបដែលកំពុងសិក្សានៅប្រទេសចិន និងបងប្អូនអតីតនិស្សិតខ្មែរបញ្ចប់ការសិក្សាពីប្រទេសចិន សូមមេត្តាចូលរួមការពារជាតិ ការពារប្រជាពលរដ្ឋខ្មែរ តាមរយៈមូលធិនិសមាគមACSC លើកទី៣ ដែលទទួលចាប់ពីថ្ងៃនេះ រហូតដល់ថ្ងៃទី២៣ ខែធ្នូ ឆ្នាំ២០២៥ ព្រមទាំងប្រគល់ជូនតាមរយៈព្រឹទ្ធសភាកម្ពុជាក្រោយថ្ងៃទី២៣ ខែធ្នូ ឆ្នាំ២០២៥ ខាងមុខនេះ។ សមាគមនិស្សិត សូមថ្លែងអំណរគុណចំពោះទឹកចិត្តសប្បុរសធម៌របស់បងប្អូននិស្សិតខ្មែរ ដែលស្នេហាជាតិ ការពារជាតិពីការឈ្លានពានពីចោរសៀម។❤️❤️❤️ខ្មែរ ជួយខ្មែរ🙏🙏🙏